पोस्ट नं 134

 पोस्ट नं 134 
*************************
दुसरा खंड- धम्मदीक्षेची मोहीम
Campaign of Conversion
*************************
भाग सातवा- महिलांची धम्मदीक्षा
Conversion of Women
1. महाप्रजापति गौतमी, यशोधरा व तिच्या मैत्रिणी यांना धम्मदीक्षा (ii)
Conversion of Mahaprajapati Gotami, Yeshodhara and her companions
*************************

11) आपल्या विनंतीला दुसऱ्यांदा नकार मिळाल्यानंतर महाप्रजापती मागे फिरून सभागृहाच्या प्रवेशद्वारापाशी जाऊन उभी राहिली. काय करावे हे तिला सुचेना. ती याप्रमाणे उभी राहिली असतानाच सभागृहाकडे येत असलेल्या आनंदाने तिला पाहिले आणि ओळखले.

12) तेव्हा त्यांनी महाप्रजापतीला विचारले, "सुजलेल्या आणि धुळीने माखलेल्या पायांनी प्रवेशद्वाराबाहेर अशी दुःखाने रडत आणि अश्रू ढाळीत का उभी आहेस?"

"कारण, आनंदा, गृहत्याग करून भगवंतांचा धम्म व विनय यांचा स्वीकार करण्याची गृहहीन जीवन जगण्याची अनुज्ञा तथागत स्त्रियांना देत नाहीत." महाप्रजापती म्हणाली.

13) नंतर स्थविर आनंद ज्या ठिकाणी तथागत होते त्या ठिकाणी गेला. त्याने तथागतांस अभिवादन केले आणि एका बाजूला बसल्यावर तो तथागतांना म्हणाला, "पहा भगवन्, महाप्रजापती गौतमी प्रवेशद्वाराबाहेर उभी आहे; तिचे पाय सुजलेले आहेत आणि ते धुळीने माखलेले आहेत; दुःखी कष्टी होऊन रडत ती अश्रू ढाळीत आहे. कारण गृहत्याग करुन आणि भगवंतांचा धम्म व विनय यांचा स्वीकार करुन गृहहीन जीवन जगण्याची अनुज्ञा भगवंत स्त्रियांना देत नाहीत. भगवन्, तिच्या इच्छेनुसार स्त्रियांना अनुज्ञा दिली तर बरे होईल."

14) "महाप्रजापतीने मावशी आणि दाई या नात्याने तथागतांचे पालनपोषण केले, त्यांना दूध दिले आणि तथागतांच्या मातेच्या मृत्यूनंतर तिने त्यांना अंगावर पाजले. याप्रमाणे तिने आपली उपयुक्तता सिद्ध केली नाही काय? म्हणून हे भगवन्, संसारत्याग करुन गृहहीन जीवन जगण्याची आणि तथागतांनी सांगितलेला धम्म आणि विनय पाळण्याची अनुज्ञा स्त्रियांना देणे योग्य होईल."

15) "नको, आनंदा. स्त्रियांना तसे करण्याला संमती देणे योग्य नाही." आनंदाने पुन्हा दुसऱ्यांदा आणि तिसऱ्यांदा त्याच शब्दांत तीच विनंती केली आणि त्याला तेच उत्तर मिळाले.

16) नंतर स्थविर आनंदाने तथागतांस विचारले, "स्त्रियांना परिव्रज्ज्या घेण्यास आपण अनुज्ञा देत नाही याचे कारण काय?"

17) *"ब्राम्हण असे मानतात की, शूद्र आणि स्त्रिया अस्वच्छ आणि हीन दर्जाच्या असल्यामुळे त्यांना मोक्ष मिळू शकत नाही. हे भगवंतांना माहीत आहे. म्हणून ते शूद्र आणि स्त्रिया यांना परिव्रज्ज्या घेऊ देत नाहीत काय? तथागतांचे मत ब्राम्हणांप्रमाणेच आहे काय?"*

18) "जशी ब्राह्मणांना दिली, तशीच शूद्रांनादेखील परिव्रज्ज्या घेऊन संघप्रवेश करण्यास तथागतांनी संमती दिली नाही काय? भगवन्, स्त्रियांच्या बाबतीत असा भेदभाव करण्याचे कारण काय?"

19) "तथागतांनी सांगितलेला धम्म आणि विनय यांचा स्वीकार करून निब्बाण प्राप्त करून घेण्यास स्त्रिया समर्थ नाहीत असे तथागतांना वाटते काय?"

*********************
For English: see the link in comment section

*************************
क्रमश: .....
रोज वाचा, "बुद्ध आणि त्यांचा धम्म"
पुढील भागात:
१. महाप्रजापति गौतमी, यशोधरा व तिच्या मैत्रिणींना धम्मदीक्षा (iii)
*************************